लकवा

जे शोध भाकरीचा घेण्या घरून गेले;

हे वृत्त आज आले की ते मरून गेले.

नावा किती बुडाल्या त्याचा हिशेब नाही;

पण दीपस्तंभ सारे सागर तरून गेले.

गावात पापण्यांचा दुष्काळ कोरडा हा-

वाटे जरी रडावे अश्रू सरून गेले.

हा चेहरा तुझाही मळकाच वाटतो रे;

आयुष्य का तुझेही ते वापरून गेले.

वेगात खूप तूही वाहू नकोस वा-या;

फाटेल आणखी हे लक्तर विरून गेले.

मेंदूस सर्व त्यांच्या झाला लगेच लकवा;

तुमचे विचारवारे ज्यांच्यावरून गेले.