दुकान

दोह्यात जीव नाही, गझलेत जान नाही;

शायर जगात दुसरा माझ्या समान नाही.

चोरून रोज खातो उर्दू मधील लोणी;

सायीवरी मराठी माझे इमान नाही.

आश्चर्य हे मला की झाली न ‘अहम’बाधा;

माझ्याशिवाय आता कोणी महान नाही!

तू देणगी दिली ना जाहीर वा छुपीही;

वेड्या तुला कधीही मिळणार मान नाही.

त्यांचा बुडेल धंदा विकती न जे स्वत:ला;

तोट्यात चालणारे माझे दुकान नाही.

(असंग्रहीत/प्रसिध्दी : ‘कविता-रती’ दिवाळी अंक २००५)