फुटाणे

तू वागतो कशाला देवादिकाप्रमाणे;

साध्याच माणसांचे आहे तुझे घराणे.

ती नोट काय कामी, जी फाटते कुठेही;

सांभाळ आपले तू कलदार एक नाणे.

घे काळजी थव्याची;विसरू नको पिलांना;

चोचीत घाल त्यांच्या तू दोनचार दाणे.

सौख्यात लोळणारा आहे पगार मोठा;

कां वाटते तरीपण येथे उदासवाणे?

राजीखुशीत नाचे लग्नात प्रेयसीच्या;

तो प्रेमवीर त्याची तकलीफ तोच जाणे!

पोटापुढे कधीही लाजू नकोस राजा;

बिनधास्त खात जावे थोडे तरी फुटाणे.