फूल

उभी जिन्दगानी पहाडाप्रमाणे;

तिला लोटतो मी कवाडाप्रमाणे.

तिची आसवेही न होती खरी अन्

तिचे हासणेही लबाडाप्रमाणे.

तुझा हात साधा न हातात माझ्या;

मला भेटली तू घबाडाप्रमाणे.

नको वागवू तू मना,दु:खओझे;

सदा विंचवाच्या बिर्‍हाडाप्रमाणे.

पुढे काढ छाती, करी उंच माथा;

इथे तू जगावे न भ्याडाप्रमाणे.

जगा वाटला मी तुला गूळ माझा;

मला फेकले तू चिपाडाप्रमाणे.

अरे खोल मातीत रुजवी मुळे तू;

तुला फूल येईल झाडाप्रमाणे.