रक्त

गो-या तुझ्या रुपाने भलती कमाल केली;

बघण्यास आरशाला दृष्टी बहाल केली.

अंधार जीवनाचा तेव्हा प्रसन्न झाला-

जाळून जीव माझा जेव्हा मशाल केली.

रेड्यास रोज देण्या उपसून ज्ञानगंगा;

त्याच्याच कातडीची आम्ही पखाल केली.

संन्यास घेतल्याने बाहेर जिंकलो पण

आतून आसवांनी हळुवार चाल केली.

तू फ़ूल मागण्याला थोडा उशीर केला;

ओसाड बाग त्यांनी नुकतीच काल केली.

समजू नकोस पडला पाऊस कुंकवाचा;

मी रक्त शिंपडोनी ही वाट लाल केली.